Grüsse aus dem Süden - ich will zurück

 Ciao a tutti?

I hoffe du issisch gnue Frutti

Come stai?

Molto bene, wüu Napoli isch d Szene

Rose si dunkuwiis

Z Meer um Korfu glänzt türkis

Melinda W. - Korfu, Juli 2025

I hoffe dir geits tiptop

U du verlürsch ke Flipflop

Am Morge ufem Balkon viu Caffée trunke

Dr Antonio nebedran het mr herzlech gwunke

Aus wäre mr scho lang Nachbare

u nid nume touris im gliche Quartier

Mini Mueter isch ebe vo dört unge

Het früecher immer neapoletanischi Lieder gsunge

Konsumiert hani zviu Cappucchino

U aube ebe o chli vino

Dichter bini drum nid nur i mine Wort

Sondern o vor Ort

In Bari, nach Korfu u Napoli bis Genua bini gsi

Iz zieht Italie am Zugfenster verbi

Es si emotionsschwangeri Zite gsi

abr di Erä isch iz verbi

I hoffe es geit dir guet, wo o immer de bisch

I bi flissig am dichte hie am Zugtisch

Voll dr maincharacter moment

I hoffe es isch chli kohärent

Di ewigi Küse vo Italie isch nebe mir verblasst

Uf dr Fähri rucklets nur schüch ir Nacht

I lase hingr mir u glich verfougt mi mini Lascht

Z einzige wome gseh het isch dr Vollmond i sire Pracht

Aues grüen

Überau Olive u fige

Gern würdi no chli blibe

D Sunne schiint, d Luft isch troche

E liechte Wind machts agnehm warm

Ar Wöschleine hänge einzelini Socke

I loufe düre Mosquitoschwarm

Irgendwo in Griecheland

Imne Kaff, ufemne Hügel

E warmi teenage Sommernacht

Homie git mr dr dübel

Peace out

I wott zrügg

Hie ischs z chaut